基金留意中港股票 (Patreon)

今個禮拜呢啲波動好耐冇見過。港股星期一朝早原本守得住，但係晏晝返嚟見到日經咁插法，條街都放棄，有佢隊落去先。之後星期二開始就穩定返，星期三就因為日本央行話喺金融情況唔穩定之下唔會加息，開始跟外圍反彈。不過最近港股都比較跟返美股走勢。同之前五月份嗰轉，美股跌但係港股升。 

今轉啲科技股算係比較抗跌。咁當然啦，之前外圍六七月咁升香港冇跟過，呢次唔係好跌都係幾正路嘅。 其實過去嘅週末，國務院都出咗文件話會刺激消費，有包括旅遊，電競，直播帶貨，非學科類嘅補習等等。不過星期一咁嘅市，講咩都冇用，保命要緊。之後教育股都有炒起，但係又係得一日貨。而家似乎所有炒呢啲新聞嘅，都係一日起兩日止咁，都係代表冇乜資金持續流入。所以嚟緊要睇呢個節奏會唔會有所改變，先可以判斷會唔會有個好些少嘅趨勢。

暫時我覺得呢個禮拜嘅焦點都係阿里巴巴(9988)，似乎啲對沖基金已經部署緊等佢入港股通。巴巴(9988)就會喺8月15號公布業績，到時應該會講埋轉香港雙重第一上市呢件事，而8月22號就會開股東大會投票，如果通過晒啲決議，咁最快可能就係8月23號就會開始入港股通（亦有其他人講要等到恆指換馬，9月9號先會入）。不過如果阿里巴巴(9988)入埋港股通，會唔會分薄騰訊(700)美團(3690)嘅北水倉位呢？

今次咁嘅史詩級拆倉，我諗令到好多對沖基金都損手爛腳，尤其是個市場波動升到咁鬼高，就算你明知會反彈都不得不減倉。加上呢一年半載，大部份人嘅倉位都係集中喺日本韓國台灣美國。唔知今次之後，啲人會唔會開始買返啲中港股票去分散風險？雖然都有聽到啲外國基金經理開始留意吓 (不是大手入貨) 啲中港股票，例如茅台(600519), AIA(1299)近排點樣。一嚟A股都係見到淨流出加上港股成交仲係好慘淡。例如星期四，低開做返個靚嘅反彈，但係晏晝北水一返嚟就不停沽貨，雖然主要沽係3隻ETF 2800/2828/3033，沽左93億貨，令到成日流出60億，搞到17,000點得而復失。加上8月19號之後，大陸就唔會公布每日北向嘅A股交易數據，改為每三個月公布一次 😅 

今個禮拜啲flows就好靜，有啲冚倉盤，例如係澳門股。不過見到最多人都係買啲高息股(6, 2638, 8, 3, 2)，不過今次喺啲本地高息股，同埋沽返啲資源股。 仲有啲對沖基金就玩買新地(16)領展(823)/沽信和(83)，都係玩呢個嘅美國減息角度，因為信和(83)係正現金嘅公司。

Watchlist Review

525 今個星期同個大市一齊插落嚟。我未將呢個stop loss調高，覺得可以俾個機會佢。

1288, 1766: 未突破，可以繼續留意住。最好有啲時間consolidate將個trading range縮窄，然後先break out會對reward : risk ratio好啲

 Watchlist

1114 表現好強。今個星期基本上冇跌。由六月至而家做咗一個短嘅consolidation。

 2208上一個突破(七月 watchlist)好快賺10幾個percent。Take profit 後 pull back不過成交唔算高，跟住跌到落之前嘅突破位（現時嘅支持)佢就再反彈。似乎隻股票真係進入stage two。呢一刻佢未有set up但可以繼續留意住，應該遲早會有下一個交易機會。

免責聲明: 所有內容僅為本頻道對其本身行為的描述，只作知識及學術分享討論，絕不含有及不應被理解作含有任何投資建議或邀約或對任何其他人士的投資建議或邀約或提供任何服務。本頻道的內容概不構成任何投資意見或購買任何證券、期貨、虛擬資產及或任何金融產品的推薦意見。本頻道的內容亦並非就任何個別投資者的特定投資目標、財務狀況及個別需要而編製。因此，投資者不應只按任何本頻道的內容或本頻道作者所提供的任何資料（包括以其他途徑提供的與頻道相關的回覆或評論）進行投資。本頻道建議任何投資者在作出任何投資決定前尋求獨立的財務及專業意見，而本頻道並不會提供有關意見。本頻道所載資料僅供參考之用，概不保證頻道內全部或其任何部分的資料在各方面均絕對正確或展示事實的全部。投資者有責任自行翻查所有資訊及數據的完整性及準確性。如有疑問，閣下應自行查核頻道所載的任何資料。 本評論上的資料，如有任何變更，恕不另行通知。對於因使用或依據本頻道內所載的資料而引起的任何損失或損害，本頻道恕不負責。投資者應當注意投資附帶風險及過往表現不能保證將來業績，過往表現不能作為日後表現之指示。