港股 Update - June 3, 2022 (Patreon)

市況好咗，跟著上海解封同中央出台政策谷經濟，指數突破到21,500點，之後有啲回調，都係健康嘅。守唔住20,800 (50MA) 就開始要小心。我睇法係應該仲有幾多人都唔係好信個市會升，如果再夾多幾百點去到21,600到21,800，我相信幾多基金要追貨因為好多仲係underweight。

星期二，5月31號，又月結又MSCI調倉，競價有成千億成交，好多股票都mark咗上去。平時月結末必有太多動作，不過今年啲股債特別波動，尤其係啲70/30嘅 fund （70%債/30%股票，退休基金多） ，五月債價升返，不過股票跌，所以令到啲70/30基金要沽債買股票。

科技股都係美團/快手最靚仔，美團業績，條數都叫靚仔不過市場都預咗係會好㗎，小心短線有人趁好消息出貨。其次就係大部份中慨股都係出完業績就抽，阿里(預期好差)，拼多多(條數靚仔)，貝殼(冇得再差)，百度(條數靚仔)，愛奇藝(條數靚仔)。可以留意一下啲有盈利改善嘅，因為大環境都唔得，收入搞唔到，所以公司多數減開支去做靚條數。不過都係見到對沖基金係$100 又沽空爸爸。

汽車板塊由開始講到而家兩三個禮拜都有三四成升幅，政策出晒，短期最好執嗰浸都差唔多。行業分析員都係預到年尾會拉多2百萬架車銷量，全年去到2100萬架。講到車，有一隻可以留意一下, 力勁（558），圖唔錯有突破，條街有買家。故仔係Volvo 已經買咗兩架9,000噸壓鑄機，之後VW，Ford，GM幾大機會都跟。預期壓鑄機呢個行業都係3-4間廠。

星期四啲水泥股大插，國務院調增政策性銀行8,000億信貸額度支持基建，國內就話政策係支持”新基建”即係再生能源，數據，5G。而唔係以前啲起路起橋起鐵路。所以見到呢排啲風電，光伏，甚至半導體喺A股都做得好好。國家電網發布八項措施穩經濟，2022年電網投資超5000億元。呢啲政策都係會對能源相關嘅股票好。

嚟緊如果個市仲有水位，科技股水位唔係太多，應該開始留意吓啲二線科技股又或者金融股，保險券商。雖然內房物管都想博下，但係好似市場仲係唔係好buy，不過呢啲一升就好難追。

最後想講香港地產股，雖然應冇乜人睇。但係星期四因為新世果(17)，恆地(12) ，恆隆(101)被踢出一個富時房地產指數(FTSE EPRA Nareit Global Real Estate Index)而大跌，6月17號收市競價大概有29-30m 股嘅貨要沽。收息嘅話真係一流，跌到股息都差唔多有六厘。恆隆仲要係過去25年派息淨係有兩年減過就係98-99年。

免責聲明

所有內容只作知識及學術分享討論。本頻道的內容概不構成任何投資意見或購買任何股票及金融產品的特定推薦意見，本頻道的內容亦並非就任何個別投資者的特定投資目標、財務狀況及個別需要而編製。投資者不應只按本頻道的內容進行投資。在作出任何投資決定前，投資者應考慮產品的特點、其本身的投資目標、可承受的風險程度及其他因素，並適當地尋求獨立的財務及專業意見。本頻道所載資料僅供參考之用，並不保證頻道內全部或其任何部分的資料在各方面均絕對正確。如有疑問,閣下應自行查核頻道所載的任何資料。 對於因使用或依據本頻道內所載的資料而引起的任何損失或損害,本人恕不負責。