[港股] 市場唞啖氣 (Patreon)

農曆新年後北水開始賣港股。1月30號，淨賣出70億港股 ，係2021年8月最高，不過南水淨買入190億A股，係2021年12月最高。啲錢又流返入去A股，同埋有人短線食糊，國內農曆新年啲消費數據唔錯，不過都係獲利先。加上月尾有rebalance, 尤其係港股呢幾個月大幅跑贏令到有啲基金要焗住沽貨來維持same exposure。

北水最近幾日賣港股

以為星期四個市會做返好啲，尤其係巿場對J Powell 啲說話係偏鴿，令到美國科技股大升。港股最後都係高開低收，下晝多咗科技股沽盤，成交縮。加上啲生物科技股大升，之前有幾次個市有啲避險，啲錢就湧返去生物科技板塊。

原本睇好A股，不過中國證監係星期三宣布IPO市場終於即將迎來註冊制的全面推行，驟眼睇落去係好事，長遠嚟講亦都係，但係短期來講就未必係咁好，因為市場擔心會多咗IPO，會抽走現有嘅資金。

香港同大陸話喺2月6號應該就會開始全面冇檢疫通關，反而令到啲reopening概念嘅股唔係好掂，澳門一月賭收其實都比市場預期好，但係當開始全面通關，就唔會有更多通關嘅好消息去炒，市場變咗就要開始睇實質嘅數據，咁下一個消費嘅高峰期係要等到五一黃金周，所以啲資金都係sell on news。

北水返嚟沽騰訊沽得好勁，加上公司停咗回購(騰訊係上年跌穿400先開始回購)拖低成個科技版塊，不過美團反而好少少，炒返個reversal trade，因為之前啲錢買騰訊沽美團，而家兩者個差價冇擴大，而令到有資金冚倉。

呢排最熱嘅話題就係OpenAI 嘅 ChatGPT, 之後百度都話玩埋一份，話會係3月份推出類似於ChatGPT的人工智能聊天機器人，令到股價炒咗上去，之後再炒埋其他AIGC ( AI Generated Content) 例如 772, 1357， 遊戲，甚至雲計算。呢個AI 未必好似之前嘅Metaverse元宇宙咁，可能真係有錢途。百度嘅搜索引擎應該越來越少人用，小紅書嘅資訊好過佢，呢個AI係有機會令到啲traffic流返去佢嗰度，令到佢嘅增加收入。