[港股] 中國ETF (FXI) 大手call option成交 (Patreon)

港股今年開局真係跩到冇人有，連跌七日終於識反彈。 恆指繼續咬住16,000點個低位(會唔會係第二隻腳？)，成交繼續非常之一般。 一路諗緊年頭，呢啲時間應該活躍啲，因為好多基金都會喺呢啲時間執一執個倉，等到今個禮拜應以為會有更加多嘅基金經理返嚟，點知仲係一潭死水咁。

睇嚟好多基金都唔係好需要執個港股倉，唔知係咪因為個倉都冇乜港股剩。 最新中國股票喺MSCI新興市場指數中的占比降至24%以下，2020年為39%，再加上啲基金經理一路都Underweight緊中港股票，同一時間亦有越來越多嘅新興市場不包括中國基金成立(例如EMXC)，所以真係冇乜錢流入嚟呢邊，而啲錢好明顯個個去炒日本，繼續有更多嘅中資基金想去投資亞洲其他市場。

恒生指數一度跌

日本Nikkei就入到升

今個禮拜，先係波叔話「資本增值稅是研究範圍之內」，雖然冇乜可能發生，但係係咁差嘅市場氣氛之下，都係比較容易借呢啲消息炒落去。仲有亦都唔少得阿爺話今年繼續會大力係金融，能源，基建，醫療呢啲領域反貪腐，再一次令到市場擔心。再加內地基金因為贖回同埋平倉線嘅壓力，令到監管部門幫手比佢哋淨賣出。而今個禮拜六就係台灣大選，市場都預期民進黨會贏，而最近嘅民調都幾接近，但係如果國民黨萬一贏嘅話個市應該會爆升。

而中國10年期債券息率跌穿咗2.5%，似乎都預視緊，嚟緊下個禮拜嘅LPR有機會下調。另一方面，韓國查緊嗰邊啲掛鉤國企指數票據(ELS)今年到期合約金額高達約1,141億港元。而大陸呢幾年好興嘅雪球產品，同時係掛鉤中証500同中証1000指數，亦都離knock in水平差幾個%，呢啲雪球產品都過千億人仔，呢兩樣產品都令到中港股市又拋售壓力。

但係，去到星期四，首先開市前人仔定價偏強幅度為去年11月以來最大，顯示出中國央行在人民幣跌至約一個月低位之際釋放出穩匯率信號。而大家都係美國公布CPI之前，搵啲藉口一齊咁淡冚，亦都令到恆指連跌七日之後終於識反彈。而下畫一開波北向資金淨流入由10億人仔，唔使一個鐘，衝到去超過70億淨流入，雖然最後正流入得返4 2億。而市場又講返呢幾排喺美股中國大盤ETF (FXI)嘅唔尋常嘅大手call option成交，啲人覺得有啲似2022年10月份咁，喺大陸放寬疫情限制之前嘅情況一樣，唔知係咪又有春江鴨。

個股方面，美團(3690)終於忍唔住，跌穿70之後要回購股票去托價，守住個IPO 價69。藥明(2269) 12月頭話2023年頭11個月新增項目只有91個，低過全年預期嘅120個。不過一個月之後，就話2023年全年新增項目有132個，咁即係12月份新增咗個項目31個，真係犀利，邊夠佢玩。

市況差就炒啲國企高息股，例如神華(1088)中海油(883)中移動(941)。加上農曆新年前夕，又炒下啲旅遊股同埋餐飲股消費。而關於Flows，市場買家一直欠奉，所以個市真係繼續係易跌難升嘅格局，升比較多都會係冚淡倉，今年到而家一路都見到美資基金喺度走貨，亦都有啲中資舉白旗投降，更多基金都係睇亞洲其他市場，例如日本印度台灣。嚟緊如果呢啲位企得穩，咁似乎農曆新年前都有機會炒返一浸，歷史數據嚟講，新年前兩三個禮拜表現都唔錯。

Watchlist 

1088 一部份took profit，一部份放緊紙鷂。現時股價extended（同平均線嘅距離遠）。所以拉回 (pull back)機會唔低。

8 就算依排大市跌，股價仲好堅固喺高位consolidate。似乎準備再突破。有機會再交易多次。

免責聲明: 所有內容只作知識及學術分享討論，絕對不會含有或提供任何投資建議或邀約或任何服務。本頻道的內容概不構成任何投資意見或購買任何股票、期貨、期權、墓金或及金融產品的特定推薦意見，本頻道的內容亦並非就任何個別投資者的特定投資目標、財務狀況及個別需要而編製。投資者不應只按本頻道的內容進行投資。在作出任何投資決定前，投資者應考慮產品的特點、其本身的投資目標、可承受的風險程度及其他因素，並適當地尋求獨立的財務及專業意見。本頻道所載資料僅供參考之用，並不保證頻道內全部或其任何部分的資料在各方面均絕對正確。投資者有責任自行翻查所有資訊及數據的完整性及準確性。如有疑問，閣下應自行查核頻道所載的任何資料。 本評論上的資料，僅按當時情況而提供， 如有任何變更，恕不預先通知。對於因使用或依據本頻道內所載的資料而引起的任何損失或損害，本人恕不負責。投資者應當注意投資附帶風險及過往表現不能保證將來業績，過往表現不能作為日後表現之指示。