港股買得未？ (Patreon)

今個禮拜恆指終於穿咗16,000，破咗上年12月個低位，之後第二日跌晒加速，而成交升到去1,300億。 市場氣氛就當然非常悲，士氣基本上都係零㗎啦。星期一大陸一年期MLF，意外唔減息，星期三公布嘅十二月份經濟數據，好壞參半，GDP就符合預期，但係樓價跌勢加速12月跌0.45%，比11月跌0.37%加快，而零售就比預期差，樓價嘅加速下滑令到市場更擔心消費會越嚟越差。雖然星期二收市之後有一萬億國債嘅消息，但係一嚟都係上年第四季講過，二嚟市場對呢個銀碼，不抱太大期望。

今個禮拜頭啲金融股開始跌先，友邦(1299)匯控(5)港交所(388)恒生(11)，睇嚟係對於聯儲局嘅減息時間同力度開始動搖，美元反彈，人仔跌返穿7.2，亦都令新興市場受壓。到星期二三開始見到啲收息股比人沽。

上個星期講過嘅內地雪球產品，似乎已經開始有啲”敲入”，內地有報道話有啲人用25%保證金去買，即係四倍槓桿，而指數到呢啲位都跌咗¼，啲雪球產品都歸0。另一方面有傳內地開始越來越多嘅私募基金已經跌到淨值0.8嘅預警線同0.7嘅清盤線，截至2023年12月29日的數據顯示，有2176隻私募產品嘅淨值低於0.8元的傳統預警線，仲有1139隻私募產品嘅淨值已經低於傳統的清盤線0.7元，加上今年A股已經跌咗超過5%，所以唔排除今個禮拜好多清倉盤。最好笑嘅係內地嘅投資者係咁掃大陸上市嘅日經ETF，炒到最高有差唔多20%溢價。

星期三大跌，都係講啲內地基金要平倉，又有雪球產品同韓國仔嘅ESL要unwind，加上啲PWM產品要平倉。都聽到有macro fund/global money 沽空港股，一嚟之前年頭到而家成交都冇乜太多，係直至去到星期三成交允上咗去，二來就係跌破支持位加short。雖然當前恆指已經超賣，但係如果大環境或者政策冇乜改變，只會都係夾吓淡倉嘅死貓彈。而亦都聽到長錢年頭都係沽貨，佢哋啲交易員都話冇乜見過咁嘅情況，因為啲基金經理知道雖然係平，但係仲驚呢個係價值陷阱。

到星期四，A股一開市好弱，之後去到差唔多晏晝嘅時候，內地上市嘅滬深300 ETF開始出現大手成交，但係到咗星期四全日四隻主要嘅滬深300 ETF成交超過300億，大家都係估國家隊托市，同時亦都令到A股收返高，而港股低位都有返啲承接力，從而做返個技術性反彈，不過暫時睇唔到會有太大力。而港股方面，星期四朝早好明顯有啲大沽家喺度，未開始已經對曬啲買盤，主要都係指數名，仲要係有幾多食幾多，大小通吃嗰種。

Market

喺最近嗰年，每次個市跌都係跌10至13%然後RSI去到超賣之後就反彈。今次從年頭開始嘅跌幅已經有11%，RSI落到30。所以短期內可能會有技術性反彈。

不過睇落去仲係死貓跳，國家隊繼續托市，似乎都係治標不治本。李強話唔會大力放水，亦都令市場失望。雖然波叔越洋送禮，話唔會有資產增值稅，都係得啖笑。暫時睇技術性反彈，之後再試2022年10月低位。

長期咁睇: 而家中國仲係結構性嘅問題，摩根大通嘅Jamie Dimon喺Davos接受CNBC採訪時表示，考慮進入世界第二大經濟體的投資者必須要「有一點擔心」，因為「風險回報狀況已經發生了巨大變化」。

喺價值方面，而家港股嘅P/E和P/B係低，但係都未到最低。

除咗估值，比起之前高或者低之外。另外要考慮嘅係公司嘅前景有冇改變五年前嘅香港/中國嘅前景同而家嗰個係咪仲係一樣呢？

另外而家喺中國嘅大型企業(無論係傳統經濟或者新嘅科技公司)。好多board裏面都要有黨員。咁呢啲機構嘅目的仲係想長期賺最多錢(好似西方嘅基本主義)定係佢哋嘅任務已經改變咗呢？

如果你覺得以上冇問題，跟住仲要考慮資金流。你覺得平，你覺得人哋睇得太悲觀。如果買嘅話就算佢唔再繼續跌，啲大機構(尤其是外資)嘅睇法唔一樣，佢哋唔買嘅話個市唔升你揸住都冇意思(所謂嘅價值陷阱)。

所以除咗平之外，仲要留意市場嘅narrative。

HSI Price to Earning (PE) ratio

HSI Price to book ratio

HSI estimated dividend yield

免責聲明: 所有內容只作知識及學術分享討論，絕對不會含有或提供任何投資建議或邀約或任何服務。本頻道的內容概不構成任何投資意見或購買任何股票、期貨、期權、墓金或及金融產品的特定推薦意見，本頻道的內容亦並非就任何個別投資者的特定投資目標、財務狀況及個別需要而編製。投資者不應只按本頻道的內容進行投資。在作出任何投資決定前，投資者應考慮產品的特點、其本身的投資目標、可承受的風險程度及其他因素，並適當地尋求獨立的財務及專業意見。本頻道所載資料僅供參考之用，並不保證頻道內全部或其任何部分的資料在各方面均絕對正確。投資者有責任自行翻查所有資訊及數據的完整性及準確性。如有疑問，閣下應自行查核頻道所載的任何資料。 本評論上的資料，僅按當時情況而提供， 如有任何變更，恕不預先通知。對於因使用或依據本頻道內所載的資料而引起的任何損失或損害，本人恕不負責。投資者應當注意投資附帶風險及過往表現不能保證將來業績，過往表現不能作為日後表現之指示。