日記/2020年12月22日－石壁的第一個清晨遇上“天琦“ (Patreon)

石壁的第一個早晨，6:30就有一把温柔嘅女聲叫大家起身 “各位犯人，現在已經係六時三十分，立即起床....." 廣東語，普通話，英文各說一次。昨晚在醫院有軟墊，係入獄後第一次有軟墊訓。
在石壁監獄內的醫院， 有白衣醫院B送餐，見我新人，多講兩句，因為我因咩事入獄，佢地全部都知，監獄冇秘密！食完早飯，見過心理醫生，生理醫生後，就去見新生組豪哥，石壁指模房好細，只有四個單人倉仔，得1米x1.5米。大約早上十點，由職員帶我去期數（工作地方），在指模房有位仇哥（四十幾歲）不停叫我死曱甴，但那位帶我去期數的年青職員，細細聲同我講：唔使理佢，我都係紀律部隊，明日紀律部隊係有守則要遵守，所以我地明白你地，有咩事同我講。
即係懲教職員都有藍／黃職員對峙！原來所謂新生組，即係在流倉（清潔）做四日，再分到其他期數。石壁流倉有三個活動室，我被安排在2號室。一入到去介紹過兩位B仔，便坐係一邊睇電視，有囚友主動問我好多嘢，因為活動室有窗，只係一條細隙又有鐵網，外邊就係操場，在活動室內，突然有人叫“天琦，你有手足來左“，在場場上一位四眼朋友行過來，這是我第一次接觸梁天琦，也是唯一次可以傾到兩句。
一個陌生的地方，陌生的環境，我好驚，一直唔敢四圍走，食完包妹，睇電視直到晚飯。這是第一次在石壁飯堂食飯，唔知坐邊，每張枱四人，被人趕完一次又一次，最後自己一個人坐，跟著大家排隊領飯，飯堂原來要自己去攞，在荔枝角係坐底派好大分別。
食完上倉，分配完倉之後，清潔一吓，執拾一吓，就冇嘢做，未收音機，只好睇吓書直到訓著！