日記/2021年1月5~監獄工資及洗費 (Patreon)

監獄係一個冰冷的地方，特別在寒冬，更加切實實的感到天氣加倍寒冷！身心皆冰冰的，手硬腳硬！天氣報告係7度，相信每個監獄都令人冰凍，但石壁唔止冰冷，而係石壁溫度低市區兩三度，即係得5度。平淡的生活，每日重覆嘅工作，食物每星期循環一次，淡而無味！今日星期二，已經入獄一個多月，妹妹上次探訪的物資，今日工作完了後，才派到我手上，點算清楚後簽收，原來所有物資會大兜亂，再由圖書館工作囚友分配，因為必須經過緝毒狗“聞”過晒所有嘢！因為係冬天，我叫家人唔好理，入爆啲物資，有咁多入咁多，自己用唔晒，可以賣比啲ON(外國人)..... 在監獄也有監獄的消費，剪頭髮（兩支煙），倉煙（五支）！

家人上次入比我的滴露洗手液都未用晒，所以今次這樽可以賣比ON，於是晚餐時同興仔講（指模房的B仔），交托他代售，原來可以賣到10非（十支煙）。而每星期有兩日係食牛肉，星期日係牛肉球，而星期二係牛扒，而我本身唔食牛，於是每次都賣比其他囚友，兩非，於是我自己就儲左小小煙（錢）係手，於是約髮型師剪頭髮了，我的期數係星期六剪的！因為之前係荔枝角，所以冇糧單，當正式去到石壁才開始有糧，糧單到底可以買到咩野食？原來計糧都有方法計算，之前係荔枝角有見過但唔明，來到石壁正式出現糧單，再問吓囚友，原來分開A（基本） 及S（技術）兩種，而級別就由A至F，即最低係AA, AS, BA, BS....FA, FS，最低$68 一星期，而最高係$200 一星期，而某幾個月有五個星期，即係叫出大糧，$200 x5 有$1000 蚊一個月，在監獄來講，人工係好高，有好多囚友都會儲糧，等出獄時有個錢係旁身！我一入去都係由AA做起，再慢慢升上去，每星期$68，每月有$68 x 4即約有$264，用來買零食都還可以，不過如果我要買郵票，就已經用左六十幾蚊！

結他已經叫左家人入比我，貓仔／鬚刨／包頭袋都已經交左錢，而家只係等物品送過來！而係未有個人鬚刨前，係有公家鬚刨用，不過就係公用！而指甲鉗必須係公用，每日有一小時左右比我們用，用完要歸還給懲教，無法啦！這是不衛生，因為如果有人有灰甲就傳染晒其他人，好在自己有消毒濕紙巾，每次用前用後我都會消毒一次。筆友開始多，因為有個組織叫石牆花，開始為手足們揾一班“寫信師”，我收到一位筆友，通過一、兩次信之後，把我的故事放在上網，於是有好多網友回覆，我入獄年歲係55歲，所以他們稱呼我為55巴（55歲的巴打），我很喜歡這個nickname，於是就用這個稱號吧！

我有提過，每年囚犯有三隻雞肶可以食，聖誕節／農曆新年／中秋節！聖誕個隻我賣左比人，所以有一件煙係手（即二十支）加上賣物資，都儲左小小煙係手，今日係糧尾，晚飯時有人開始問我借煙，我唔敢亂借，所以只係借左比兩位熟人，每人借出兩非及五非！都有啲擔心收唔到！

返到倉，都係睇書寫信，我明白如果坐十幾年，真係幾個學位都可以讀完，平行時空，獄中時間太多了！