沙嶺公墓篇（二） (Patreon)

唔知大家有冇曾經去過沙嶺公墓呢？其實沙嶺公墓真係好大，據說有眾多黑衣死者，死得不明不白，若家人都唔知的話，只會當失蹤處理，而屍體冇人認領就會送去沙嶺公墓安葬或火化（食環署指，過去3年(2016-2019)共處理1340宗無人認領遺體，為其進行土葬或火化，平均每年有逾400無主孤魂）。

小弟首次去沙嶺係2019年10月至11月間，共去了2次。第一次唔識路，上水站轉小巴，落車再行入去，搵左一小時左右，就搵到一個只有三個2019年嘅碑係到，冇理由只有3個。當時係下午2:30左右，雖然眼睛見唔到什麼，但當行入公墓範圍時，寒氣陰氣耳嗚頭痛雞皮反胃全部出曬來，感覺並非一般的靈體，力量大好多。今次暫時感受唔到惡意，但壓迫感超重，什麼是壓迫感？當你徒手潛落十米水底時，你所感受到的水壓就係呢種壓迫感！

『記得上次，當時一行三人，大家同時感覺有黑影行過，沙嶺嘅地形係小山丘，小斜坡下有條行人路，墓地在斜坡上一級，大家在距離約5米行人路的斜坡上，感覺到有黑影行過，大家不約而同地行落行人路望下是否有其他人來拜祭。當日是星期四，不是假日，比較人少，是大家選擇這日的理由。當落到行人路左望右望，兩邊大直路冇理由在一到三秒內消失，大家都不再理會，直接行去目的地。

祭品就放在墓地上時，要燒要點的都做完，碑上有號數的，在資料上一定唔係呢個數，三個人，兩男一女都決定跟那個影方向去行一行，況且時間尚早，只係下午三點十分左右。行左一陣見到有些大碑寫住不同年份共有幾多人嘅大碑放在一起，睇左一陣再直行，有條馬路，過唔過呢？係未決定之際，我見到對面有2到3個黑影，好似等緊我地咁！（寫到呢到，毛管戙起）

我話過去睇睇啦！女士猶豫左一陣，決定去，過左馬路，行左一至兩分鐘就見到一大片斜坡，大部份係2019年新墓。當時最新號碼已經係107左右，上前一看，原來之前的2019係已經火葬骨灰，而這一段全部係葬屍體，有此新葬，墓地唔深。冇法，祭品已用完，只有下次再來，感謝帶路者。』

今次同其他手足加埋記者，一齊去沙嶺拜祭一吓，大家都知，葬係公墓即係無人認領，無人拜祭，有手足係做殯儀業，所以今次由佢帶領，帶齊物品一同入去。（作者的手機被用作呈堂証供，因為想寫這篇靈異經歷，都搞左幾粒鐘，最後可以係雲端下載返啲相，很不容易先可以揾到）。

今次係第二次，因為太多新墓啦！上次冇記者又唔夠菊花，所今次帶多好多物品去，圖中的白菊花係小弟放上去，而每個新墳都裝香插蠟燭上去，只要係2019年6月打後都有，係燒祭品前，先同土地公公打個招乎，之後就一路燒一路大聲叫“手足收嘢啦“ “有怨報怨，有仇報仇“...

新墓其實很淺，可踏上去，泥土只有一吋在左就係木板，而木板也是十分單薄，只要一個不留神便會踏破木箱。之後小弟見到新墓旁有個隆係度，就豪不考慮訓左落去，因為泥土太淺，左手可以摸住旁邊個棺木，合埋雙眼去感受！希望可以感受到一啲靈體，點知我感受到嘅只係有一個大佬係到，應該有幾佰年甚至過千年，佢比我訊息係呢度係佢睇住，雖然冇咩惡意，但係我真係感受唔到其他朋友，因為用身體直接訓係泥土，感受係最真實。跟上次有好大分別。

毛管戙／麻痺／反胃／頭暈...都一齊來，連自己上返地面能力都冇，個隆明明得一米深左右咋！朋友見到就來拉我上來扶我起身，好在有保護，除了有配戴玉觀音外，也有護身符在身，只係比陰氣影響到！靜坐調息，休息了半小時左右，我地就回程。

返到家中門口，雖然有土地，都係跨吓火盤安全啲，不過都有幾日呆吓呆吓咁，又有小小微燒，沙嶺真係有啲道行好高嘅物體係到，自己只有小小保護而沒有法力，都唔知佢係乜，好在冇咩惡意，唔係可能我已經唔知去左邊度！